Новиот директор на ЕСМ Дистрибуција на топлинска енергија, Петар Милетиќ, оствари средба со засегнатите страни со цел да се реши прашањето за приклучување кон системот за централно греење во новоизградените и објектите кои се во изградба на потегот помеѓу бул. „Борис Трајковски” и улиците „Михаил Чаков”, „Народни Херои” и „Лазар Димитров”.
Поради неажурноста и неодговорноста на претходното раководство, топловодот не бил реализиран неколку години, но конечно новото раководство наиде на разбирање и решение за овој проблем со изградба на нов секундарен топловод. Во координација со генералниот директор на АД ЕСМ Лазо Узунчев, проектот беше одблокиран и почнат со реализација во рок од три дена.
Со изградбата на секундарниот топловод ќе се создадат услови за приклучување кон системот за централно греење. Инвеститорите на објектите согласно нивните обврски, конечно ќе можат да ја завршат постапката за приклучување на објектите кон системот за централно греење.
Согласно Одобрение за градење бр. 13-2942/3 од 24.07.2024 година и правосилност од 03.09.2024 година издадено од страна на Општина Кисела Вода, ЕСM Дистрибуција на топлинска енергија ДООЕЛ Скопје ќе започне со изградба на нов секундарен топловод А3.010 од постоечка шахта 010 на вод АЗ делница 005 за планирани објекти според ДУП Ј13 за населбата „11-ти Октомври”, Скопје.
Исто така, новиот директор на ЕСМ Дистрибуција на топлинска енергија Петар Милетиќ, во најкус временски период потпиша 27 согласности за испорачување на топлинска енергија во новоизградените објекти, кои претходно биле уценувани за истите енергетски согласности.
„Граѓаните можат да бидат спокојни. Активностите ќе се изведуваат експедитивно, без застој и навремено, тоа јавно го ветувам”, истакна директорот Милетиќ.
Милетиќ ја презема функцијата директор на ЕСМ Дистрибуција на топлинска енергија минатата недела, на 06.09.2024.
