Најдобриот македонски автомобилист Игор Стефановски – Иџе влезе во семејството на Ферари, синоќа во Скопје промовирајќи го својот нов автомобил – Ферари 488 В8, специјално дизајнирано за неговите нови европски предизвици во 2024 година.
Заедно со своите најблиски соработници го откри новото возило, вредно 350.000 евра за кое е познато дека има осумцилиндричен мотор со зафатнина од 3,9 литри и околу 700 коњски сили.
„Кога ве гледам сите тука вечерва како моја поддршка, чувствувам дека тоа е мојата најголема победа во животот, без разлика на сите освоени европски титули досега. Сето ова е мотив повеќе за мене и за идните предизвици“ – истакна Стефановски кој е актуелен европски шампион во автомобилизам на ридски патеки.
Според најавите, македонскиот автомобилист новата сезона ќе ја отвори во Австрија на 26. април 2024 година, а потоа ќе вози во Шпанија, Португалија, Чешка, Германија, Италија, Полска, Швајцарија, Словенија и Хрватска.
